Shkolla fillore 'Vëllezërit Frashëri' me këtë ngjyrë karakteristike, ndodhet në njërin nga brigjet e fshatit Çubrel të Skënderajt. Ka një pozitë interesante, në një ambient të hapur e të pastër, pranë rrugës gjarpërore Mitrovicë-Pejë. Në këtë shkollë jo aq të madhe vijojnë mësimin kryesisht nxënësit e fshatit Çubrel dhe Vitak. Për nga pamja e jashtme është shkollë tërheqëse, por edhe brendia e saj nuk qëndron keq. Klasët nuk janë të mëdha, por janë të pastra dhe të ndritshme. Edhe pse nuk i plotëson kushtet e një shkolle moderne, kjo shkollë ka nxjerrë nga gjiri i saj nxënës të spikatur në shumë lëmi. Ka prej tyre që sot janë edhe doktor shkence. Poashtu ka një personel shumë të dashur dhe punëtor.
Momentalisht kjo shkollë ka 356 nxënës në gjithsej 13 paralele. Synimet e personelit të kësaj shkolle janë shpresëlënëse. Në një të ardhme të afërt shkolla e tyre do të bëhet më moderne.